Era Val d’Aran se trape ena part centrau dera sarrada pirenenca e ei era soleta Val des Pirenèus d’aiguavessant atlantic. Era sua estenuda ei de 620 km2, tèrmie ath nòrd tamb França (Arrièja), ath sud damb era Alta Ribagorça e Aragon, ar èst tamb eth Pallars Sobirà e ar oèst un aute còp tamb Aragon e França (Nauta Garona). Eth sòn arriu principau, era Garona, trauèsse e vertèbre tota era Val e desbòque en Atlantic (Bordèus). Aguest emplaçament geografic, ei a díder era sua orientacion naturau cap a tèrres occitanes, amassa damb era manca ath long des sègles d’unes bones comunicacions tamb Catalunya e Aragon, an hèt qu’era Val d’Aran age clares diferéncies tamb es autes vals e contrades catalanes tant en aspècte fisic com culturau. Era pròva mès clara d’aguesta diferéncia se manifèste en hèt d’auer coma lengua pròpia er occitan, coneishut en Aran com aranès.
Era populacion censada ena Val d’Aran er an 1996 ei de 6.991 abitants e era sua economia ei complètament orientada tath sector des servicis.