Norvègia bastirà lo mur del Nòrd

Norvègia es a bastir una barrièra d’acièr sus sa luenchenca frontièra amb Russia en Arctic après confirmar que i a agut  una creissença dels migrants qu’intrèron en aquel país l’an passat. Los grops de defensa dels dreches dels migrants an criticat la mesura en tot avisar qu’aquò es un pas de mai devèrs una nòva Guèrra Freja amb Russia.
 
Mas lo govèrn norvegian ja a confirmat que la nòva barrièra, o “mur del Nòrd” aurà un pauc mai de 20 quilomètres de longor e 3,5 mètres e mièg de nautor e que serà bastida per refortir lo passsatge frontalièr d’Storskog e assegurar aital aquel ponch de l’Euròpa del Nòrd dins lo contraròtle dels migrants que vòlon intrar dins l’airal de Schengen.
 
Ça que la, e mai se Norvègia es coneguda per èsser totjorn estada un paradís pels demandaires de refugi e d’asil, ara la construccion d’aquela barrièra vòl empachar los migrants d’intrar per aquel luòc dins l’espaci comun amb l’Union Europèa -Norvègia fa pas partida de l’UE mas de l’airal de Schengen- pr’amor qu’en 2015 mai de 5500 migrants i intrèron per aquí. Amb aquò Norvègia vòl mostrar lo cambiament d’opinion que l’a patit lo país dins los darrièrs tempses a respècte de l’immigracion.
 
D’un autre costat, Suècia a anonciat ongan que tanben refortirà lo contraròtle de las demandas d’asil politic. Aquela accion es estada fòrtament criticada per divèrses grops de defensa dels dreches dels immigrants que dison qu’aquò es solament un resson de la guerra freja que i aguèt amb l’Union Sovietica fins a 1991.
 
 
En ivèrn serà ja bastit
 
Aital, la contruccion d’aquesta barrièra començarà lèu e deurà èsser acabada abans l’ivèrn. Divèrses trabalhs son estats realizats dins l’airal per contrarotlar lo passatge de rangièrs e de cèrvis a travèrs dels bòsques. La decision es estada qualificada pel ministre de la justícia norvegian coma “de mesuras responsablas”. Mas aquò s’es fach pr’amor que Moscòu e Òslo an reconegut que lo transit dels immigrants dins la zòna es ara pus grand qu’abans.
 
En mai d’aquò, degun a pas demandat d’asil politic a travèrs de la frontièra politica de Norvègia en 2015, segon çò que diguèt la Direccion Norvegiana de l’Immigracion. “Ont es lo besonh de bastir una autra barrièra?”, çò demandèt Rune Rafaelsen, cònsol màger de la region de Soer-Varanger qu’inclutz la frontièra amb Russia. “A l’ora d’ara i a tròp de barrièras en Euròpa. Russia ja a una barrièra de mai de 200 quilomètres sus la frontièra amb Norvègia” .
 
Al delà, Rune Rafelsen confirmèt que Norvègia aviá avançat e plan après laissar endarrièr la barrièra que la desseparava de Russia pendent lo temps de la Guèrra Freja. Rafelsen es lo cap del Partit Laborista norvegian, e confirmèt qu’aquò èra un pas endarrièr.
 
“Avèm d’èsser un país ont la gent pòsca cercar refugi, çò diguèt Linn Landro, del Grop de Planvenguda als Refugiats de Norvègia. Bastir una barrièra es un simbòl fòrça negatiu pr’amor qu’es tanben una manièra de dire a Russia que i a pas de fisança amb eles”. Uèi cada an 250 000 personas trespassan aquesta frontièra, una chifra luènh de las 5000 que o fasián pendent la Guèrra Freja.
 
 
 
 
Christian Andreu

Evo Morales denóncia una “conspiracion politica” per privatizar las ressorsas naturalas de Bolívia

Lo president de Bolívia, Evo Morales, a condemnat l’assassinat del viceministre de l’Interior, Rodolfo Illanes, victima de las protèstas dels cooperativistas minièrs. Segon Morales, aquelas mobilizacions son pas qu’“una conspiracion politica”, e precisa que seguisson pas vertadièrament una revendicacion sociala, segon çò que rapòrta Europa Press.
 
Dins una conferéncia de premsa, en seguida d’una reünion amb sos ministres, Morales a explicat que “lo dialòg èra totjorn present a cada moment” mas que los cooperativistas minièrs volián pas dialogar. Dins aquel sens Morales precisèt que los protestataris demandan de poder signar de contractes amb d’entrepresas privadas e planhèt que i aguèsse mai de dirigents de l’oposicion a protestar que de cooperativistas, que “son estats enganats”.
 
Morales qualifiquèt l’assassinat d’Illanes de “coard” e defendèt que “las ressorsas naturalas son del pòble bolivian, e per tant lo declari eròi de las ressorsas naturalas”. Lo president declarèt tanben tres jorns de dòl oficials, mas sens suspension de las activitats, e afirmèt, net e clar, que “lo pòble bolivian cedirà pas sas ressorsas a d’interèsses privats nacionals e encara mens a d’estrangièrs”.

Eth sindic d’Aran assistís as actes dera VIIIau amassada de Veterans dera companhia d’Esquiadors e Escaladors de Vielha

  Un an mès, era Val d’Aran a acuelhut era amassada de Veterans dera companhia d’Esquiadors e Escaladors de Vielha a on pendent tota era dimenjada an realizat diferenti actes.   Eth sindic d’Aran, Carlos Barrera, a assistit ar acte d’aumenatge a on s’an amassat mès d’un centenat de veterans dera companhia d’Esquiadors e Escaladors…